Um verkið
ARNFIRÐINGUR 1. árg. 1. tbl., Pétur J. Thorsteinsson (1854-1929) stórútgerðarmaður á Bíldudal stofnaði blaðið Arnfirðing á Bíldudal og kom á fót prentsmiðju þar, sem nefndist eftir blaðinu og hét Prentsmiðja Arnfirðings. Hann hafði útvegað sér prentpressu frá Birni Jónssyni, eiganda Ísafoldar og nýtt letur frá útlöndum. Hann réð síðan Þorstein Erlingsson (1858-1914) skáld sem ritstjóra, en hann hafði verið ritstjóri Bjarka á Eskifirði árin á undan. Tilgangur Péturs með þessu var að efla menningu á suðurhluta fjarðanna og bæta í skarð Þjóðviljans, sem nú var fluttur til Bessastaða með Skúla Thoroddsen. – Arnfirðingur kom fyrst út í nóvember 1901 og var í stóru broti eða 41 x 28,5 cm, sem sýnir að pressan hefur verið nokkuð stór. Hann var aðeins prentaður á Bíldudal til 10. júlí 1902, alls 22 tölublöð, en eftir það var hann prentaður í Félagsprentsmiðjunni í Reykjavík þar til hann hætti að koma út í janúar 1903.
Heiðrún var sögusafn blaðsins Arnfirðingur og var það sem kallað var neðanmálssaga og umbrotin þannig að hægt var að klippa hana frá aðalblaðinu og búa til sjálfstæða bók. Þetta tíðkaðist mjög á þessum árum. Heiðrún kom út í tveimur hlutum og var hinn fyrri (s.1-64) prentaður á Bíldudal, en hinn síðari (1-56) syðra. Eftir því sem best er vitað var ekkert annað prentað á Bíldudal en Arnfirðingur og Heiðrún.
Útgáfa og prentun:
Eigandi og útgefandi: Prentfélag Arnfirðinga, 1901-1902, Bíldudal, Prentsmiðja Arnfirðings. – Reykjavík. Félagsprentsmiðjan
FÁGÆTI – Forngripur
